2024 жылғы 11-15 қараша аралығында «Өскемен жылу электр орталығы» ЖШС-нің қазандық жабдықтары бойынша бас инженері Андрей Сергеевич Букарев қазақстандық делегация құрамында Германияға жұмыс сапарымен барды
Іссапардың негізгі мақсаты – қазіргі заманғы жылу электр станцияларында қолданылатын экологиялық шығарындыларды азайтудың озық технологияларын зерттеу және олардың Қазақстанда қолдану мүмкіндігін қарастыру.
Сапар барысында делегация Штутгарттағы Альтбах және Кёльн маңындағы Нидерауссем сияқты Еуропаның ең ірі жылу электр станцияларының жұмыс тәжірибесімен танысты. Делегация мүшелеріне түтін газдарын тазалаудың ең заманауи жүйелері таныстырылды. Олардың қатарында селективті каталитикалық қалпына келтіру (SCR) технологиясы, күкіртсіздендіру жүйелері және атмосфераға бөлшектердің шығарындыларын минималды деңгейге дейін азайтатын жоғары технологиялық сүзгілер болды.
Сапардың басты нәтижелерінің бірі – Германияда қолданылатын экологиялық технологияларды Қазақстанның жағдайына бейімдеу мүмкіндіктерін талдау. Ерекше назар құрамында күл мөлшері жоғары, қазақстандық көмірге тән ерекшеліктерді ескере отырып, технологияларды қолдану мүмкіндіктеріне аударылды. Сонымен қатар жабдықтарды жергілікті деңгейде өндіру және отандық мамандарды оқыту перспективалары талқыланды.
Steinmüller Engineering GmbH және Wallstein Group компанияларының өндірістік алаңдарында делегация энергия тиімділігін арттыруға бағытталған бірегей инженерлік шешімдермен, соның ішінде гибридті сүзгілер және жылуды қалпына келтіру технологияларымен танысты. Бұл әзірлемелер Қазақстан ЖЭО-ларын экологиялық талаптарға сәйкестендіру және жаңғырту үдерісіне оң ықпал етуі мүмкін.
Іссапардың қорытындылары қазақстандық энергетика саласында энергия тиімділігі мен экологиялық қауіпсіздікті арттыруға бағытталған ұзақ мерзімді серіктестікті дамыту үшін негіз қалады. Германияда зерделенген озық технологияларды енгізу атмосфералық шығарындыларды азайтуға, станциялардың тиімділігін арттыруға және олардың заманауи экологиялық талаптарға сай жауапты кәсіпорын ретіндегі мәртебесін бекітуге жол ашады.
