ЖЭО жұмысын не тоқтата алады?

Жауабы қарапайым. Су. Жағалаулық сорғы станциясы Үлбі өзенінен Өскемен ЖЭО-ға су береді. Бұл су турбиналық жабдықтарды салқындатады, қазандықтардың жұмысын қамтамасыз етеді, градирнясындағы булану шығындарын толтырады, сондай-ақ күлді кетіру жүйесінде және өртке қарсы қорғаныс үшін қолданылады.

Су тұрақты берілмесе, жабдықтарды салқындату мүмкін емес. Ал салқындатусыз турбиналар мен қазандықтар жұмыс істей алмайды. Жағалаулық сорғы станциясында қуатты циркуляциялық сорғылар орнатылған. Су магистральдық құбырлар арқылы станцияға түседі, технологиялық циклден өтеді және айналым жүйесіне қайта оралады.

Сорғы станциясының жұмысы толықтай автоматтандырылған, бірақ әрбір көрсеткішті турбиналық цех мамандары қадағалап отырады. Олар өзендегі су деңгейін, су қабылдағыштың жай-күйін, құбырлардың тазалығын және жүйедегі қысымның тұрақтылығын бақылайды.

Жағалаулық сорғы станциясы жылу мен электр энергиясын тікелей өндірмейді. Бірақ онсыз ЖЭО жұмыс істей алмайды. Бұл - қала тұрғындарының көпшілігіне көрінбейтін, бірақ қаланың бүкіл энергия жүйесінің тұрақтылығы тікелей байланысты болатын маңызды учаске.